Vallaliidsi ussi pääväga suvõst sügüsehe

GALERII

Eesti Kultuuriseltse Ühendüs kutsõ meid põimukuu edimäidsil päivil (1.-4. august) Obinitsa suvõpäivilõ. Mii seldsist oll kah esindus kohal - Plumanni Kaja-Riina ja Müürsepä Külli.

Joudsõmi õkva tuus aos kohalõ, ku Rauni Eero kõnõl ütest senikuulmada plaanist- tetä Talina ja Harjumaa kultuuriseltsega üts vallaliidsi ussi päiv 22.09.2024. Haarimi mõttõst kinni - võrukõsõ omma iks ederiän olnu ku midägi põnõvat sünnüs.

Pannimi juhatusõ liikmidõga (Mõtsalligu Eva, Liini Helbe, Soka Ollõv, Plumanni Kaja-Riina) pää` kokko ja „vaaritimi“ vällä, et teemi` üte kõrraligu ummi asju vällänäütüse üten muusika ja vahelugõmiisiga.

Meil om jo seldsin  kats kõvva klavõrikunstnikku Kolditsi Maie  ja Traksi Lia, kiä` nii üte- ku katõkaupa, nii katõ ku nelä käega klavõrilõ vallu mõistva anda.

Edimält sai Maie sõrmi alt kuulda kuulda` eelmidse sajandi algupoolõ popurriid mi vanavanõmbidõ meelüslaulõst: Isamaa ilu hoieldes, Ema süda, Tiideratas-taaderatas, Kas tunned maad.., Miks sa nutad, lillekene, Minge üles mägedele jne.

Kullõjilõ olli laulu tutva ja laulti üten.

Tõõsõs tutvust Maie laulu Lapsepõlve kodu (Seal kus rukkiväli...) keerulist  saamisluku, mille  1929. a om plaadi pääle laulnu Viisimaa Aarne. Paul Dresseri puult 1897. a kirotõt populaarnõ laul kuulutõdi 1913. a Indiana osariigi hümnis!

Kolmandas võtsõva Maie ja Lia katõ pääle üles teema` oopereist ja operetest (Offenbach Barkarool, G. Verdi Rigoletto, Traviata, J. Bock Viiuldaja katusel, R. Rodgers Helisev Muusika).

Ja sis astsõ ussõst sisse (üten sügüsega) korgõ ja uutmalda küläline Rauni Eero esi! Vallaliidsi ussi päävä mõttõ esä ja tugõja.

Andsõmi tälle sõnna, küssemi, et kuis ta hüä mõtõ tä pään sündü ja võimalusõ telli uma lemmiklugu Maie ja Lia repertuaarist.

Pääle tuu tull viil üts üllätüs. Publiku siäst astsõ klavõri manu ekspromt-esinejä, koori- ja lauluansamblidõ juhendäja Sirje Merelaid. Nä mängsevä üten Liaga Waldteufeli valsitsükli Uisutajad. Vägüsi kisksõ valsisammus…

Publiku hulgan oll viil üts kuulus küläline - EMTA tuntu-tiitü klavõrioppaja emeriitdotsent Ada Kuuseoks. 

Umma armast hümni ”Latsõpõlvõ Võrumaa” sai peris kats kõrd läbi laultus ja Rauni Eerolõ ka laulusõna` kingitüs, et tä järgmine kõrd meile küllä tullõn saanu üten laulda`!

Laulõ ja pillimängu vaihõlõ sai 2-3 pausi tettüs, et rahval olnu võimalik kohvi juvva, kuuki süvvä, puuvilju maitsa ja lähembält välläpanõkit kaia, midä selts om uma 34 aasta joosul tennü.

Mii poetess Plumanni Kaja-Riina pikä` värsiriä` olli ka hüäs vahepalas muusikalõ.

Ku noist nukrusõnuut pääle tull, lugi Müürsepä Külli nalju elost hindäst, mis olli köüdet ansambli Liiso juhtumiisiga.

Kõik kohalolija` ütli ussõst vällä astõn õnnõ kiidusõnno, ku ilosahe sai suvõst sügüsehe mintüs.

Müürsepä Külli  23.-25.09.2024